لاہور: مرکزی مسلم لیگ نے پنجاب کی وزیر اطلاعات عظمیٰ بخاری کو 5 ارب روپے ہرجانے کا قانونی نوٹس بھجوا دیا ہے۔ جماعت کا الزام ہے کہ وزیر اطلاعات نے اس کے خلاف ہتک آمیز اور جھوٹے بیانات دیے ہیں۔
یہ نوٹس مرکزی مسلم لیگ کے صدر خالد مسعود سندھو کی جانب سے ان کے وکلا کے ذریعے جاری کیا گیا ہے۔ اس میں عظمیٰ بخاری سے سات روز کے اندر معافی مانگنے، الزامات واپس لینے اور سوشل میڈیا سے متنازع مواد ہٹانے کا مطالبہ کیا گیا ہے۔
نوٹس کے مطابق عظمیٰ بخاری نے ایکس اور الیکٹرانک میڈیا پر اپنے بیانات میں مرکزی مسلم لیگ کو مبینہ طور پر "دہشت گرد"، "غیر قانونی" اور "کالعدم جماعت" قرار دیا۔ جماعت کے مطابق یہ الزامات جھوٹے، بے بنیاد اور ہتک آمیز ہیں۔
نوٹس میں کہا گیا ہے کہ مرکزی مسلم لیگ الیکشن کمیشن آف پاکستان میں رجسٹرڈ سیاسی جماعت ہے، اور 2022 سے سیاسی اور فلاحی سرگرمیاں کر رہی ہے۔ نوٹس کے مطابق جماعت نے 2024 کے عام انتخابات میں "کرسی" کے انتخابی نشان پر حصہ لیا تھا، اور 8 نومبر 2026 کو این اے 77 گوجرانوالہ کے ضمنی انتخاب میں دوسرے نمبر پر رہی۔
نوٹس میں عظمیٰ بخاری سے مطالبہ کیا گیا ہے کہ وہ جماعت کے خلاف مزید بیانات سے گریز کریں اور متنازع پوسٹس اور ویڈیوز حذف کریں۔ ان سے کہا گیا ہے کہ وہ الزامات عوامی سطح پر واپس لیں، اور جماعت کی قیادت، کارکنوں اور حامیوں سے غیر مشروط تحریری اور عوامی معافی مانگیں۔ ان سے آئندہ ایسے بیانات نہ دینے کی تحریری یقین دہانی اور متعلقہ ریکارڈ محفوظ رکھنے کا بھی کہا گیا ہے۔
نوٹس کے مطابق ان بیانات سے خالد مسعود سندھو کی ساکھ کو نقصان پہنچا ہے، جس کے ازالے کے لیے 5 ارب روپے ہرجانہ طلب کیا گیا ہے۔ نوٹس میں کہا گیا ہے کہ پیکا ایکٹ کے تحت مبینہ خلاف ورزی پر قومی سائبر کرائم تحقیقاتی ادارے (این سی سی آئی اے) سے بھی رجوع کیا جائے گا۔ مطالبات پورے نہ ہونے کی صورت میں سات روز بعد عدالت میں کارروائی شروع کی جائے گی۔
عظمیٰ بخاری یا حکومت پنجاب کی جانب سے نوٹس پر تاحال کوئی ردعمل سامنے نہیں آیا۔





