اسلام آباد: وزیراعظم کے مشیر برائے سیاسی امور رانا ثنااللہ نے منگل کو کہا کہ سیاسی جماعتیں آمادہ ہوں تو وزیراعظم شہباز شریف انسداد دہشت گردی پر اتفاق رائے پیدا کرنے کے لیے انہیں مذاکرات کی دعوت دینے کو تیار ہیں۔

سینیٹ میں اظہار خیال کرتے ہوئے رانا ثنااللہ نے اپوزیشن پر زور دیا کہ وہ دیگر مطالبات ایک طرف رکھ کر دہشت گردی سے نمٹنے کے لیے متحد ہو۔

انہوں نے کہا کہ اگر تمام جماعتیں اس معاملے پر مل بیٹھنے پر اتفاق کریں تو وزیراعظم انہیں دعوت دے کر آگے بڑھنے کا راستہ تلاش کرنے کے لیے تیار ہیں۔

رانا ثنااللہ کے مطابق مذاکرات میں اس بات پر بھی غور کیا جاسکتا ہے کہ دہشت گردی کے خلاف کارروائیوں کو پوری قوم کی حمایت کیسے حاصل ہو۔

مسلم لیگ ن کے رہنما نے سیاسی جماعتوں سے اپیل کی کہ وہ دہشت گردی کے مسئلے پر مشترکہ مؤقف اختیار کریں اور اس کے مقابلے کے لیے یکجہتی کا مظاہرہ کریں۔