پشاور: خیبرپختونخوا میں لڑکیوں کی شادی کی کم از کم قانونی عمر 16 سال برقرار رکھنے والے 1929 کے قانون کو پشاور ہائیکورٹ میں چیلنج کر دیا گیا ہے۔ درخواست میں لڑکوں اور لڑکیوں دونوں کے لیے شادی کی کم از کم عمر 18 سال مقرر کرنے کی استدعا کی گئی ہے۔

یہ آئینی درخواست 6 نومبر 2026 کو 16 اور 17 سال کی دو بچیوں نے اپنے والد کے ذریعے دائر کی۔ درخواست میں چائلڈ میرج ریسٹرینٹ ایکٹ 1929 کی دفعہ 2 (اے) کو چیلنج کیا گیا ہے، جس کے تحت صوبے میں لڑکیوں کی شادی کی کم از کم عمر 16 اور لڑکوں کی 18 سال مقرر ہے۔

درخواست گزاروں کا مؤقف ہے کہ جنس کی بنیاد پر شادی کی عمر میں فرق آئین کے آرٹیکلز 9، 14 اور 25 کے منافی ہے۔ ان کے مطابق آرٹیکل 25(2) جنس کی بنیاد پر امتیاز کی ممانعت کرتا ہے، جبکہ آرٹیکل 25(3) ریاست کو خواتین اور بچوں کے تحفظ کے لیے خصوصی اقدامات کا اختیار دیتا ہے۔ درخواست میں آئین کے آرٹیکل 35 کا بھی حوالہ دیا گیا ہے، جس کے تحت ریاست شادی، خاندان، ماں اور بچے کے تحفظ کی پابند ہے۔

درخواست میں عدالت سے استدعا کی گئی ہے کہ لڑکیوں کے لیے 16 سال کی حد کو غیر آئینی قرار دیا جائے، اور صوبائی حکومت 15 دن کے اندر قانون کا ترمیم شدہ متن جاری کر کے اپنی ویب سائٹ پر شائع کرے۔ درخواست گزاروں نے وفاقی اور صوبائی حکومتوں کو ضروری قانون سازی کرنے اور خیبرپختونخوا چائلڈ میرجز ریسٹرینٹ بل صوبائی اسمبلی میں پیش کرنے کی ہدایت دینے کی بھی استدعا کی ہے۔

مقدمے میں خیبرپختونخوا حکومت، محکمہ سماجی بہبود، صوبائی چائلڈ پروٹیکشن اینڈ ویلفیئر کمیشن، صوبائی کمیشن برائے حقوق نسواں، محکمہ قانون اور وفاقی حکومت کو فریق بنایا گیا ہے۔

درخواست کے مطابق اٹھارہویں ترمیم کے بعد شادی اور بچوں کے حقوق سے متعلق قانون سازی کا اختیار صوبوں کو منتقل ہو گیا تھا۔ تاہم صوبے نے اپنا قانون منظور نہیں کیا، اس لیے آئین کے آرٹیکل 270-AA(6) کے تحت 1929 کا قانون خیبرپختونخوا میں بدستور نافذ ہے۔

ملک کے دیگر حصوں میں صورتحال مختلف ہے۔ سندھ اسمبلی نے 28 اپریل 2014 کو چائلڈ میرجز ریسٹرینٹ ایکٹ 2013 منظور کیا تھا، جس کے تحت لڑکوں اور لڑکیوں دونوں کے لیے شادی کی کم از کم عمر 18 سال مقرر کی گئی۔ اسلام آباد کے لیے اسی نوعیت کے قانون کو صدر مملکت نے 29 مئی 2025 کو منظوری دی، جبکہ بلوچستان اسمبلی نے 14 نومبر 2025 کو اپنا قانون منظور کیا۔

پنجاب میں لاہور ہائیکورٹ نے 9 اپریل 2024 کے فیصلے میں 1929 کے قانون میں لڑکیوں کے لیے 16 سال کی حد کو آئین کے آرٹیکل 25 کے منافی قرار دے کر کالعدم کر دیا تھا۔

دیگر صوبوں کے قوانین میں سخت سزائیں بھی مقرر ہیں۔ سندھ اور اسلام آباد میں کم عمر سے شادی کرنے والے بالغ مرد کے لیے 2 سے 3 سال قید بامشقت کی سزا ہے، جبکہ بلوچستان میں اس کے ساتھ ایک سے 2 لاکھ روپے جرمانہ بھی رکھا گیا ہے۔ اسلام آباد کے قانون میں کم عمری کی شادی کے بعد ساتھ رہنے کو چائلڈ ابیوز قرار دیا گیا ہے، جس پر 5 سے 7 سال قید اور کم از کم 10 لاکھ روپے جرمانے کی سزا ہے۔

درخواست میں نشاندہی کی گئی ہے کہ خیبرپختونخوا کے اپنے کئی قوانین 18 سال سے کم عمر فرد کو بچہ تسلیم کرتے ہیں، جن میں چائلڈ پروٹیکشن اینڈ ویلفیئر ایکٹ 2010 اور گھریلو تشدد کے خلاف 2021 کا قانون شامل ہیں۔ درخواست کے مطابق کیلاش میرج ایکٹ 2026 میں بھی کیلاش برادری کے لیے شادی کی کم از کم عمر 18 سال رکھی گئی ہے۔ درخواست گزاروں کا کہنا ہے کہ 1929 کے قانون میں 16 سال کی حد سے صوبائی قوانین میں تضاد پیدا ہو رہا ہے۔

درخواست میں 20 اگست 2026 کے چائلڈ پروٹیکشن کورٹ پشاور کے ایک حکم کا حوالہ بھی دیا گیا ہے۔ اس مقدمے میں چائلڈ پروٹیکشن یونٹ نے تقریباً ساڑھے 13 سال کی ایک بچی کو مجوزہ شادی کی اطلاع پر تحویل میں لیا تھا۔ عدالت نے 1929 کے قانون کی بنیاد پر والد کو 20 لاکھ روپے کے مچلکے جمع کرانے کا حکم دیا کہ بچی کی شادی 16 سال کی عمر سے پہلے نہیں کی جائے گی۔

قانونی ماہرین کے مطابق 1929 کا قانون نوآبادیاتی دور کی یادگار ہے، جسے موجودہ سماجی ضروریات، بچوں کے حقوق اور آئینی تقاضوں کے مطابق بنانے کی ضرورت ہے۔ ماہرین کا کہنا ہے کہ صرف عمر کا تعین کافی نہیں، بلکہ نکاح رجسٹرار، والدین، سرپرستوں اور شادی میں معاونت کرنے والوں کے لیے مؤثر قانونی ذمہ داریاں اور سزائیں بھی ضروری ہیں۔

وفاقی شرعی عدالت 6 مارچ 2023 کو سندھ کے قانون کے خلاف دائر درخواست مسترد کر چکی ہے۔ عدالت نے قرار دیا تھا کہ ریاست کی جانب سے شادی کی کم از کم عمر 18 سال مقرر کرنا اسلامی احکامات کے منافی نہیں۔ فیصلے میں اردن، ملائیشیا، مصر اور تیونس کی مثال بھی دی گئی، جہاں شادی کی کم از کم عمر قانوناً مقرر ہے۔

خیبرپختونخوا حکومت بھی کم عمری کی شادی روکنے کے لیے قانون سازی کا عندیہ دے چکی ہے۔ سابق معاون خصوصی برائے بہبود آبادی طفیل انجم نے 19 اگست 2026 کو پشاور میں اقوام متحدہ کے ادارے یو این ایف پی اے کے اجلاس میں کہا تھا کہ 18 سال سے کم عمر بچوں کی شادی روکنے کے لیے قانون متعارف کرایا جائے گا۔

تاہم یہ بل تاحال اسمبلی میں پیش نہیں کیا گیا۔ درخواست کے ساتھ منسلک محکمہ قانون کے جانچ شدہ مسودے کا عنوان "خیبرپختونخوا چائلڈ میرجز ریسٹرینٹ ایکٹ 2019" ہے، یعنی یہ بل کم از کم 2019 سے تیار پڑا ہے۔ مسودے کے مطابق کم عمر سے شادی کرنے والے بالغ، نکاح پڑھانے والے اور والدین کو 2 سے 3 سال قید اور 45 ہزار روپے تک جرمانہ ہو سکے گا، جبکہ نکاح رجسٹرار دونوں فریقین کا شناختی کارڈ چیک کرنے کا پابند ہوگا۔

نیشنل کمیشن آن دی رائٹس آف چائلڈ کے اعداد و شمار کے مطابق خیبرپختونخوا میں 20 سے 24 سال کی 26.3 فیصد خواتین کی شادی 18 سال سے پہلے ہو چکی تھی۔ یہ اعداد و شمار 2019 کے ملٹی پل انڈیکیٹر کلسٹر سروے پر مبنی ہیں۔

لاہور ہائیکورٹ کے فیصلے میں یونیسیف کے حوالے سے بتایا گیا تھا کہ ملک بھر میں 21 فیصد لڑکیوں کی شادی 18 سال اور 3 فیصد کی 15 سال سے پہلے ہو جاتی ہے۔ فیصلے کے مطابق پاکستان ڈیموگرافک اینڈ ہیلتھ سروے 2017-18 میں 15 سال کی عمر میں شادی کی شرح 1.6 سے بڑھ کر 1.8 فیصد ہو گئی، اور 15 سے 19 سال کی ماؤں میں اموات کی بڑی وجہ حمل اور زچگی کی پیچیدگیاں ہیں۔

طبی ماہرین کے مطابق کم عمری کی شادی سے بچیوں کی تعلیم متاثر ہونے، قبل از وقت حمل، زچگی کی پیچیدگیوں اور نفسیاتی مسائل کے امکانات بڑھ جاتے ہیں۔

چارسدہ سے تعلق رکھنے والی ایک خاتون نے بتایا کہ ان کی شادی 16 سال سے کم عمر میں کر دی گئی تھی، اور پہلے بچے کی پیدائش کے دوران انہیں کئی طبی پیچیدگیوں کا سامنا کرنا پڑا۔ انہوں نے والدین سے اپیل کی کہ بچیوں کی شادی 18 سال سے پہلے نہ کریں، کیونکہ یہ عمر تعلیم حاصل کرنے اور مستقبل بنانے کی ہوتی ہے۔

واضح رہے کہ پشاور ہائیکورٹ میں دائر درخواست پر تاحال کوئی فیصلہ سامنے نہیں آیا۔