پشاور: خیبر پختونخوا پولیس نے دعویٰ کیا ہے کہ کوہاٹ کے علاقے درابو کچ میں پولیس پارٹی پر حملے کے بعد جوابی کارروائی میں 18 دہشت گرد ہلاک ہوئے، جبکہ حملے میں 10 پولیس اہلکار شہید ہوگئے۔

سینٹرل پولیس آفس سے جاری تازہ بیان کے مطابق خیبر پختونخوا پولیس نے مقامی سول انتظامیہ کے تعاون سے درابو کچ میں غیر قانونی طور پر سونے کی کان کنی کرنے والے عناصر کے خلاف آپریشن کیا تھا۔

پولیس کے مطابق آپریشن مکمل کرنے کے بعد اہلکار واپس آ رہے تھے کہ جرائم پیشہ عناصر کے ایما پر کالعدم تحریک طالبان پاکستان سے منسلک قرار دیے جانے والے مسلح عناصر نے پولیس پارٹی پر حملہ کر دیا۔

سینٹرل پولیس آفس کا کہنا ہے کہ پولیس اہلکاروں نے حملہ آوروں کا مقابلہ کیا اور فائرنگ کے تبادلے میں 18 مشتبہ دہشت گرد مارے گئے۔

بیان میں تصدیق کی گئی کہ حملے کے دوران خیبر پختونخوا پولیس کے 10 اہلکار شہید ہوئے، جن کا تعلق صوبے کے مختلف علاقوں، بالخصوص ضلع کوہاٹ سے تھا۔

پولیس کا جرائم پیشہ عناصر اور دہشت گردوں کے گٹھ جوڑ کا الزام

سینٹرل پولیس آفس نے الزام عائد کیا کہ غیر قانونی سرگرمیوں میں ملوث جرائم پیشہ گروہ اور دہشت گرد تنظیمیں ایک دوسرے کے ساتھ منظم روابط رکھتے ہیں۔

پولیس کے مطابق غیر قانونی کان کنی کے خلاف کارروائی کرنے والی نفری پر حملہ اس مبینہ گٹھ جوڑ کی نشاندہی کرتا ہے۔

بیان میں یہ دعویٰ بھی کیا گیا کہ بعض جرائم پیشہ عناصر اور دہشت گرد گروہوں کو بیرونی پشت پناہی حاصل ہے، تاہم اس الزام کے حق میں کوئی قابلِ تصدیق شواہد فراہم نہیں کیے گئے۔

سینٹرل پولیس آفس نے واضح کیا کہ دہشت گردوں، ان کے سہولت کاروں اور غیر قانونی سرگرمیوں میں ملوث جرائم پیشہ گروہوں کے خلاف کارروائیاں جاری رکھی جائیں گی۔

پولیس حکام نے حملے میں شہید ہونے والے اہلکاروں کو خراجِ عقیدت پیش کرتے ہوئے کہا کہ ان کی خدمات اور قربانیوں کو یاد رکھا جائے گا۔

واضح رہے کہ جوابی کارروائی میں 18 مشتبہ دہشت گردوں کی ہلاکت کا دعویٰ پولیس کے تازہ بیان پر مبنی ہے، جس کی آزادانہ تصدیق نہیں ہو سکی۔