اینڈریو اور ٹرسٹن ٹیٹ نے فلوریڈا کی ایک عدالت سے درخواست کی ہے کہ انہیں ضمانت پر جیل سے رہا کیا جائے تاکہ وہ برطانیہ حوالگی کے خلاف مقدمہ لڑ سکیں، جہاں ان پر ریپ اور انسانی اسمگلنگ کے الزامات عائد کیے گئے ہیں۔
جیل کی وردی میں عدالت کے سامنے پیش ہونے والے دونوں بھائیوں نے کہا کہ انہوں نے وہ جرائم نہیں کیے جن کا ان پر الزام لگایا گیا ہے۔ انہوں نے جیل میں قید کے حالات پر بھی کھل کر شکایات کیں۔
کیس کی سماعت کرنے والی جج لارین لوئس نے کہا کہ وہ اپنا تحریری فیصلہ بعد میں جاری کریں گی۔ دوسری جانب استغاثہ نے مؤقف اختیار کیا کہ دونوں بھائی ملک سے فرار ہونے کا خطرہ رکھتے ہیں۔
برطانوی حکام کے پاس مکمل حوالگی کی درخواست جمع کرانے کے لیے 16 ستمبر تک کا وقت ہے۔
سابق پیشہ ور کِک باکسر اینڈریو ٹیٹ نے عدالت میں بیان دیا کہ مالی طور پر اپنا گزارا کرنے کے لیے انہیں ”زیادہ وزنی اور کم عمر حریفوں کے خلاف دوبارہ باکسنگ رنگ میں اترنا پڑا۔“ سی بی ایس نیوز کے مطابق، انہوں نے کہا، ”میں نے کچھ احمقانہ باتیں کی ہیں، لیکن بعض اوقات توجہ حاصل کرنے کے لیے انٹرنیٹ کو ہلا دینا پڑتا ہے۔“
انہوں نے مزید کہا، ”میرے ساتھ ایل چاپو جیسا سلوک کیا جا رہا ہے،“ میکسیکو کے بدنام زمانہ منشیات کے سرغنے کا حوالہ دیتے ہوئے، اور دعویٰ کیا کہ ”لیکن عدالتی نظام میں میرا ریکارڈ بالکل صاف ہے۔“
برطانیہ نے ٹیٹ برادران کے خلاف مجموعی طور پر 59 فوجداری الزامات عائد کیے ہیں، جن میں جنسی اسمگلنگ اور ایک بچے کی فحش تصاویر سے متعلق الزامات بھی شامل ہیں۔
برطانوی حکام نے گزشتہ سال دونوں بھائیوں کے خلاف 21 الزامات عائد کیے تھے، جبکہ گزشتہ ماہ مزید 38 الزامات شامل کیے گئے۔
دونوں بھائیوں کو 2022 میں رومانیہ میں بھی جنسی اسمگلنگ کے الزامات کا سامنا کرنا پڑا تھا۔ انہیں سفری پابندی کا بھی سامنا رہا، جو بعد ازاں 2025 میں امریکا جانے کی اجازت ملنے تک برقرار رہی۔
