اسلام آباد: چیف آف دی نیول اسٹاف ایڈمرل نوید اشرف نے کہا ہے کہ پاکستان نیوی پیشہ ورانہ مہارت، غیر متزلزل عزم اور جذبۂ ایثار کے باعث ایک مضبوط بحری جنگی قوت میں تبدیل ہو چکی ہے۔

یومِ بحریہ کے موقع پر اپنے پیغام میں نیول چیف نے کہا کہ پاکستان نیوی بدلتے ہوئے بحری سلامتی کے چیلنجز سے نمٹنے کے لیے اپنے آپریشنل پلیٹ فارمز کو جدید بنا رہی ہے اور نئے فوجی تصورات کو اپنایا جا رہا ہے۔

ایڈمرل نوید اشرف نے پاکستان نیوی کے شہداء اور غازیوں کو خراجِ عقیدت پیش کرتے ہوئے کہا کہ ان کی بے مثال قربانیوں نے ملکی خودمختاری اور بحری سرحدوں کے تحفظ میں بنیادی کردار ادا کیا۔

یومِ بحریہ کے موقع پر صدر آصف علی زرداری اور وزیراعظم شہباز شریف نے پاکستان نیوی کے افسران، سیلرز اور سول اہلکاروں کو مبارکباد دی۔ دونوں رہنماؤں نے اس اعتماد کا اظہار کیا کہ پاک بحریہ اپنی آپریشنل روایات کو برقرار رکھتے ہوئے فرائض بہادری، وقار اور پیشہ ورانہ انداز میں انجام دیتی رہے گی۔

صدر زرداری نے یومِ بحریہ کی تاریخی اہمیت اجاگر کرتے ہوئے آپریشن سوم ناتھ کا حوالہ دیا، جو پاکستان نیوی نے 7 اور 8 ستمبر 1965 کی درمیانی شب دوارکا میں قائم بھارتی بحری تنصیب کے خلاف کیا تھا۔ صدر نے کہا کہ اس کارروائی نے پاک بحریہ کی بہادری اور عزم کا مظاہرہ کیا اور ملکی بحری دفاع کو مضبوط بنانے اور دشمن کی کارروائیوں کو روکنے کے لیے ایک مضبوط قوت کی بنیاد رکھی۔

وزیراعظم شہباز شریف نے کہا کہ 8 ستمبر 1965 کی جنگ کے دوران بحری اہلکاروں کی بہادری اور عزم کی یاد دلاتا ہے۔ انہوں نے مزید کہا کہ گزشتہ سال معرکۂ حق کے دوران بھی پاکستان نیوی نے اسی اعلیٰ سطح کی آپریشنل تیاری اور جذبے کا مظاہرہ کرتے ہوئے سمندر میں ایک عددی اعتبار سے برتر حریف کو جارحیت سے باز رکھا۔