پشاور: شدت پسند گروہوں نے عام مارکیٹ میں دستیاب کمرشل ڈرونز کو ہتھیار بناتے ہوئے پشاور میں کارروائیوں کا نیا محاذ کھول دیا ہے، جس کے ذریعے کئی کلومیٹر دور سے پولیس انفراسٹرکچر کو نشانہ بنایا جا رہا ہے۔ حالیہ ہفتوں کے دوران صوبائی دارالحکومت کی تنصیبات پر کم از کم دو فضائی حملے ہوئے ہیں، جن میں ترناب چوکی پر حملہ شامل ہے جس میں چار افراد زخمی ہوئے، جبکہ اس کے 72 گھنٹے بعد متنی میں ایک پولیس اسٹیشن کو ڈرون سے نشانہ بنایا گیا۔
اگرچہ متنی واقعے کے دوران لوہے کی حفاظتی جالی دار چادروں نے نقصان کو محدود رکھا، تاہم سینئر حکام تسلیم کرتے ہیں کہ خیبر، مہمند اور درہ آدم خیل کی سرحد سے متصل دور دراز کی چوکیوں کے لیے ایسے فضائی حملے شدید چیلنج بن چکے ہیں۔
پولیس اعداد و شمار کے مطابق جنوری سے جولائی 2026 کے دوران خیبر پختونخوا کے مختلف علاقوں، جیسے ملاکنڈ، بنوں، لکی مروت اور باجوڑ میں ڈرون حملوں کی 250 سے زائد کوششیں رپورٹ کی گئیں۔ پشاور کے تمام 34 پولیس اسٹیشنوں اور 84 چیک پوسٹوں پر اعلیٰ ٹیکنالوجی پر مبنی اینٹی ڈرون آلات نصب کرنے میں درپیش مشکلات کے باوجود، کیپٹل سٹی پولیس چیف ڈاکٹر میاں سعید نے تصدیق کی ہے کہ حساس مقامات پر ڈرون مخالف نظام اور تھرمل امیجنگ کی تعینیاتی کی جا رہی ہے، جبکہ اہلکاروں کو فضائی نگرانی اور حملوں سے محفوظ رکھنے کے لیے ایس او پیز کو بھی جدید بنایا جا رہا ہے۔
