لندن: برطانوی فلم ساز اور دستاویزی فلم پروڈیوسر جمائما گولڈ اسمتھ نے فنانسر اور فلم پروڈیوسر کیمرون او ریلی سے شادی کرلی ہے، جس کی تصدیق جمائما کے خاندان کی جانب سے سوشل میڈیا پر کی گئی۔
جمائما کی بھابھی نے اپنے شوہر بین گولڈ اسمتھ کے ہمراہ شادی کی تقریب کی تصویر شیئر کرتے ہوئے جمائما اور کیمرون کی شادی کی خوشی منانے کا ذکر کیا۔
52 سالہ جمائما گولڈ اسمتھ اس سے قبل سابق پاکستانی وزیر اعظم اور کرکٹ کپتان عمران خان سے شادی شدہ تھیں۔ دونوں نے 1995 میں شادی کی تھی اور 2004 میں طلاق ہوگئی تھی۔ ان کے دو بیٹے سلیمان اور قاسم ہیں۔
جمائما اور کیمرون او ریلی کے تعلقات ایک سال سے زیادہ عرصے سے خبروں میں تھے۔ مئی میں سامنے آنے والی رپورٹس کے مطابق دونوں کی ملاقات فلم اور دستاویزی منصوبوں کے حوالے سے پیشہ ورانہ کام کے دوران ہوئی تھی۔ او ریلی بطور ایگزیکٹو پروڈیوسر فلم اور دستاویزی منصوبوں سے وابستہ رہے ہیں۔ دونوں کے لندن اور سوئٹزرلینڈ میں وقت گزارنے کی اطلاعات بھی سامنے آئی تھیں۔
62 سالہ کیمرون او ریلی آئرش آسٹریلوی کاروباری شخصیت اور فنانسر ہیں اور آنجہانی سر انتھونی او ریلی کے بیٹے ہیں، جو آئرلینڈ کے معروف میڈیا کاروباری اور سابق بین الاقوامی رگبی کھلاڑی تھے۔ کیمرون نے ابتدا میں میڈیا کے شعبے میں کام کیا اور بعد میں نجی سرمایہ کاری کی طرف آئے۔
2003 میں انہوں نے بے یارڈ کیپیٹل کے نام سے نجی سرمایہ کاری کا ادارہ قائم کیا اور سوئس توانائی میٹرنگ کمپنی لینڈس اینڈ گائر کے حصول میں اہم کردار ادا کیا۔ یہ کمپنی بعد میں 2011 میں تقریباً 2.3 ارب ڈالر کے سودے میں توشیبا کو فروخت کی گئی۔
جمائما نے فلم اور دستاویزی فلم سازی میں بھی نمایاں کام کیا ہے اور ان کے کریڈٹس میں دی کیس اگینسٹ عدنان سید، دی کلنٹن افیئر اور واٹس لو گاٹ ٹو ڈو ود اٹ؟ شامل ہیں۔
شادی کی خبر سے قبل مئی میں دونوں کی منگنی کی رپورٹس سامنے آئی تھیں۔ اس وقت جمائما یا کیمرون نے باضابطہ طور پر منگنی کی تصدیق نہیں کی تھی اور خبریں ذرائع کے حوالے سے سامنے آئی تھیں۔
اب خاندان کی جانب سے شادی کی تصدیق کے بعد یہ تعلق ایک نئے مرحلے میں داخل ہوگیا ہے، جبکہ جمائما کی پہلی شادی ختم ہوئے دو دہائیوں سے زیادہ عرصہ گزر چکا ہے۔
