دھابیجی پمپنگ کمپلیکس میں اتوار کی صبح بجلی کے بڑے بریک ڈاؤن کے باعث پانی کے 10 پمپس بند ہوگئے، جس سے کراچی کے مختلف علاقوں میں پانی کی فراہمی متاثر ہونے کا خدشہ پیدا ہوگیا ہے۔

کراچی واٹر اینڈ سیوریج کارپوریشن (KW&SC) کے ترجمان کے مطابق دھابیجی پمپنگ کمپلیکس کے مختلف مراحل میں بجلی کی فراہمی تقریباً صبح 6 بجے متاثر ہوئی۔

کے الیکٹرک کے مطابق بجلی کی بندش اس کے سسٹم میں کیبل فالٹ کے باعث ہوئی، جس سے دھابیجی کے پمپنگ اسٹیشنز کو بجلی کی فراہمی متاثر ہوئی۔

بجلی کی بندش کے بعد دھابیجی کے تھرڈ فیز، فورتھ فیز اور K-III پمپ ہاؤسز میں کام رک گیا۔ پمپنگ کمپلیکس کے مجموعی 21 پمپس میں سے 10 بجلی کی بندش کے باعث بند ہوگئے۔

KW&SC کی کے الیکٹرک سے رابطے کی کوشش

واٹر کارپوریشن کے حکام کا کہنا ہے کہ متاثرہ پمپنگ اسٹیشنز پر بجلی کی فراہمی جلد بحال کرنے کے لیے کے الیکٹرک انتظامیہ سے مسلسل رابطہ کیا جا رہا ہے۔

حکام کے مطابق اگر متاثرہ پمپس زیادہ دیر تک بند رہے تو کراچی کے مختلف علاقوں میں پانی کی فراہمی جزوی طور پر متاثر ہوسکتی ہے۔

KW&SC کا کہنا ہے کہ بجلی بحال ہوتے ہی بند ہونے والے 10 پمپس دوبارہ چلائے جائیں گے، جبکہ صورتحال پر مسلسل نظر رکھی جا رہی ہے تاکہ پانی کی فراہمی پر پڑنے والے اثرات کو کم کیا جاسکے۔