بشکیک: یوریشین سیاسی، سیکورٹی اور معاشی تنظیم شنگھائی تعاون تنظیم (ایس سی او) کے قیام کی 25 ویں سالگرہ کے موقع پر اگلے ہفتے قرغزستان کے دارالحکومت بشکیک میں سربراہی اجلاس منعقد ہو رہا ہے جس میں عالمی رہنما شرکت کریں گے۔

یوریشیائی سفارت کاری کے اس اہم موڑ پر ہونے والے اجلاس میں پاکستانی وزیر اعظم شہباز شریف، چینی صدر شی جن پنگ، بھارتی وزیر اعظم نریندر مودی، روسی صدر ولادی میر پوتن اور ایرانی صدر مسعود پزشکیان سمیت اہم عالمی رہنما یکجا ہو رہے ہیں۔

سوویت یونین کے بعد سرحدی سیکورٹی کے لیے 1996ء میں 'شنگھائی فائیو' کے طور پر قائم ہونے والے اس بلاک کا 2001ء میں باقاعدہ ایس سی او کے طور پر آغاز کیا گیا تھا، جس کے ارکان کی تعداد اب 10 ہو چکی ہے، جن میں بھارت، پاکستان، ایران اور حال ہی میں شامل ہونے والا بیلاروس بھی شامل ہیں۔ سخت عسکری یا معاشی بلاک کے بجائے اتفاقِ رائے سے کام کرنے والی ایس سی او دنیا کی 40 فیصد سے زائد آبادی یعنی تقریباً 3.4 ارب افراد کی نمائندگی کرتی ہے اور عالمی جی ڈی پی کے تقریباً چوتھائی حصے کی حامل ہے۔

بشکیک اجلاس میں سیکورٹی، کثیر الجہتی تجارت اور یوریشیا بھر میں ٹرانسپورٹ انفراسٹرکچر پر توجہ مرکوز رکھی جائے گی۔ رکن ممالک تاشقند ریجنل اینٹی ٹیررسٹ سٹرکچر (رَیٹس) کے ذریعے دہشت گردی کے خاتمے، افغانستان میں استحکام اور مشرقِ وسطیٰ کی کشیدگی پر خصوصی توجہ دیتے ہوئے علاقائی سیکورٹی چیلنجز کا جائزہ لیں گے۔ معاشی روابط کو فروغ دینا بھی ایجنڈے کا اہم حصہ ہے، جس میں 7,200 کلومیٹر طویل انٹرنیشنل نارتھ ساؤتھ ٹرانسپورٹ راہداری (این ایس ٹی سی) اور ایس سی او ڈیولپمنٹ بینک سے متعلق جاری مذاکرات شامل ہیں۔

اجلاس کی سائیڈ لائنز پر متعدد اہم دوطرفہ ملاقاتیں بھی متوقع ہیں۔ چین اور بھارت کے رہنما ہمالیائی سرحد پر سرحدی تنازعات کو پرامن بنانے کی حالیہ کوششوں کے بعد شرکت کر رہے ہیں۔ دوسری جانب، امریکہ کے شدید معاشی دباؤ کے شکار ایران کے صدر پزشکیان کی روسی صدر پوتن سے ملاقات طے ہے۔ جاری علاقائی کشیدگی کے تناظر میں پاکستانی وزیر اعظم شہباز شریف کی شرکت کے باعث پاکستان اور بھارت کے رہنما ایک ہی فورم پر موجود ہوں گے۔

دو روزہ کانفرنس کا اختتام بشکیک اعلامیے کی منظوری پر ہوگا، جو تنظیم کی مستقبل کی حکمتِ عملی کا تعاقب کرے گا۔ یہ اجلاس قرغزستان کی صدارت کی مدت کے اختتام کا بھی مظہر ہے، جس کے بعد پاکستان اگلے سال کے لیے ایس سی او کی باری صدارت سنبھالے گا اور 2027ء میں اگلے سربراہی اجلاس کی میزبانی کرے گا۔