برلن: شیاؤمی کی بنیادی شناخت اگرچہ اب بھی اسمارٹ فونز ہی ہیں، تاہم گھریلو اشیا اور مربوط ڈیوائسز اس کے کاروبار کا اہم حصہ بن چکی ہیں۔ اور اب یہ کمپنی چار پہیوں والی گاڑیوں پر توجہ مرکوز کر رہی ہے۔

چین کے صارفین کے لیے شیاؤمی کی گاڑیاں اب کوئی نئی بات نہیں رہی ہیں، اور اب کمپنی انہیں یورپی سڑکوں پر لانے کا ارادہ رکھتی ہے۔

اسی تناظر میں شیاؤمی نے IFA 2026 میں اعلان کیا کہ وہ 2027ء میں یورپ میں اپنی الیکٹرک گاڑیاں پیش کرنے کا ارادہ رکھتی ہے، جو اسمارٹ فونز اور الیکٹرانکس سے آگے اس کے پھیلاؤ کا اگلا مرحلہ ہے۔

گاڑی کو ایک الگ پروڈکٹ کے طور پر دیکھنے کے بجائے شیاؤمی کا کہنا ہے کہ وہ اسے گھریلو ڈیوائسز سے جڑے ایک اسمارٹ نظام کا حصہ بنانا چاہتی ہے، تاکہ صارفین اپنے روزمرہ کے آلات سے منسلک رہتے ہوئے مختلف ماحول میں منتقل ہو سکیں۔

جولائی میں اپنی تمام الیکٹرک 'اسکائی نوميڈ' ایس یو ویز کا اعلان کرنے کے بعد، شیاؤمی نے چین میں باضابطہ طور پر چار گاڑیوں کی لائن اپ متعارف کروائی ہے، جس میں N70 پرو ماڈل کی ابتدائی قیمت 31,275 امریکی ڈالر ہے۔

سب سے مہنگا ماڈل 'اسکائی نوميڈ N90 اسٹوڈیو میکس' 44,685 امریکی ڈالر کا ہے، جس میں پاپ اپ کیمپنگ چھت، گھومنے والی اگلی نشستیں، فولڈ ہونے والی میز اور بستر میں تبدیل ہونے والی پچھلی نشستیں شامل ہیں۔

شیاؤمی نے اگست میں مسلسل پانچویں مہینے 30,000 سے زائد گاڑیاں ڈلیور کی ہیں۔ تاہم، اگست میں SU7 سیڈان اور YU7 ایس یو وی (سپورٹس یوٹیلیٹی وہیکل) کی فروخت کی الگ الگ تفصیلات فی الحال دستیاب نہیں ہیں۔

شیاؤمی آٹوز نے جاری سال کے پہلے آٹھ مہینوں میں 2,46,475 گاڑیاں ڈلیور کی ہیں، جو گزشتہ سال سے 9.65 فیصد زیادہ ہیں، تاہم پہلے سات ماہ میں 5,50,000 گاڑیوں کے سالانہ ہدف کا 44.8 فیصد حاصل کرنے کے بعد اس رفتار میں کچھ سستی آئی ہے۔

کمپنی بی وائی ڈی (BYD) جیسے اپنے حریفوں کی طرح، جنہوں نے یورپی یونین میں اپنے برانڈ کو کامیابی سے قائم کیا ہے، اگلے سال کے اوائل میں یورپی مارکیٹ میں داخل ہونے کا ارادہ رکھتی ہے۔