راولپنڈی: ریجنل پولیس آفیسر (آر پی او) راولپنڈی بابر سرفراز الپا نے ویسٹریج کے علاقے میں 12 سالہ بچی کو اغوا اور مبینہ جنسی زیادتی کا نشانہ بنانے والے ملزم کی فوری گرفتاری کا حکم دیا ہے۔ متاثرہ بچی جمعرات کی رات محلہ سلیمان آباد میں اپنے گھر سے جلانے کی لکڑیاں لینے نکلی تھی جس کے بعد وہ لاپتا ہو گئی۔ بچی کے بروقت واپس نہ لوٹنے پر محنت کش والد گلفراز نے اہل خانہ کے ہمراہ رات بھر اس کی تلاش جاری رکھی۔

ایف آئی آر کے مطابق جمعے کی صبح والد نے ناظم اللہ نامی ملزم کو بچی کے ساتھ علاقے سے نکلنے کی کوشش کرتے ہوئے دیکھ لیا۔ روکنے پر متاثرہ بچی نے اپنے والد کو بتایا کہ ملزم اسے بہلا پھسلا کر اپنے بیٹھک میں لے گیا جہاں اس نے بچی کو جنسی زیادتی کا نشانہ بنایا۔

واقعے کا علم ہوتے ہی رشتہ دار اور علاقہ مکین بڑی تعداد میں گلی میں جمع ہو گئے اور شدید اشتعال پھیل گیا۔ مشتعل ہجوم نے ملزم کو شدید تشدد کا نشانہ بنایا، جس کی ویڈیو بعد میں آن لائن وائرل ہو گئی۔ تاہم پولیس کے موقع پر پہنچنے سے قبل ہی ملزم فرار ہونے میں کامیاب ہو گیا۔

واقعے کے بعد آر پی او بابر سرفراز الپا نے سینئر افسران کو تحقیقات کی خود نگرانی کرنے اور ملزم کا سراغ لگانے کی ہدایت کی۔ ویسٹریج پولیس نے والد کی مدعیت میں مقدمہ درج کر لیا ہے، جبکہ تفتیشی افسران نے ملزم کو جلد گرفتار کرنے کا عزم ظاہر کیا ہے۔