لاہور: پاکستان ویمنز ٹیم کی فاسٹ بولر کائنات امتیاز نے بین الاقوامی کرکٹ سے ریٹائرمنٹ کا اعلان کر دیا ہے۔ انہوں نے قومی ٹیم کی نمائندگی کرتے ہوئے 19 ون ڈے انٹرنیشنل اور 21 ٹی20 انٹرنیشنل میچز کھیلے۔
دائیں ہاتھ کی فاسٹ بولر نے اکتوبر 2010 میں پوچیفسٹروم میں جنوبی افریقہ کے خلاف ٹی20 انٹرنیشنل ڈیبیو کیا، جبکہ انہوں نے اپنا ون ڈے انٹرنیشنل ڈیبیو بنگلہ دیش کے شہر فتح اللہ میں آئرلینڈ کے خلاف کیا۔
کائنات امتیاز 2017 کے آئی سی سی ویمنز کرکٹ ورلڈ کپ کے لیے پاکستان کے اسکواڈ کا حصہ تھیں، جہاں انہوں نے چار میچز کھیلے۔
وہ 2010 اور 2014 کے ایشین گیمز میں گولڈ میڈل جیتنے والی پاکستانی ویمنز کرکٹ ٹیموں کا بھی حصہ رہیں۔ یہ مقابلے بالترتیب چین اور جنوبی کوریا میں منعقد ہوئے تھے۔ بعد ازاں انہوں نے 2022 کے کامن ویلتھ گیمز میں بھی پاکستان کی نمائندگی کی۔
کائنات نے اپنا آخری ٹی20 انٹرنیشنل اکتوبر 2022 میں سلہٹ میں تھائی لینڈ کے خلاف کھیلا، جبکہ ان کا آخری ون ڈے انٹرنیشنل جنوری 2023 میں گابا میں آسٹریلیا کے خلاف تھا۔
ان کے کرکٹ کیریئر کا آغاز 2007 میں ہوا، جب انہوں نے پی سی بی نیشنل اسکولز انڈر 17 ویمنز چیمپئن شپ میں کراچی اسکولز انڈر 17 ٹیم کی نمائندگی کی۔ انہوں نے مارچ 2008 میں ڈومیسٹک لسٹ اے اور چار ماہ بعد ٹی20 کرکٹ میں ڈیبیو کیا۔
کھیل کے میدان سے ریٹائرمنٹ کے بعد کائنات امتیاز نے میچ آفیشیٹنگ کا آغاز کر دیا ہے۔ انہوں نے اگست اور ستمبر میں ہونے والے پی سی بی نیشنل ویمنز انڈر 19 ٹی20 ٹورنامنٹ میں بطور میچ ریفری کام کیا۔
ان کی والدہ سلیمہ امتیاز بھی کرکٹ آفیشیٹنگ سے وابستہ ہیں اور 2024 میں آئی سی سی انٹرنیشنل ڈیولپمنٹ پینل میں شامل ہونے والی پاکستان کی پہلی خاتون امپائر بنی تھیں۔ وہ اب تک نو ویمنز ون ڈے انٹرنیشنل اور 69 ویمنز ٹی20 انٹرنیشنل میچز میں امپائرنگ کر چکی ہیں۔
