اسلام آباد: بل اینڈ ملینڈا گیٹس فاؤنڈیشن کے ایک اعلیٰ سطحی وفد نے جمعرات کو اسلام آباد میں وزیر مملکت برائے مالیات، محصول اور ریلوے بلال اظہر کیانی سے ملاقات کی جس میں پاکستان کے ڈیجیٹل ترقیاٹی اور معاشی اصلاحاتی ایجنڈے پر پیش رفت کا جائزہ لیا گیا۔ جینڈر ایکولٹی ڈویژن کی صدر ڈاکٹر انیتا زیدی اور گلوبل پالیسی اینڈ ایڈووکیسی ڈویژن کی قائم مقام صدر ڈاکٹر کلپنا کوچھر پر مشتمل وفد نے وزیر اعظم کے 'کیش لیس پاکستان' اقدام کے تحت ملک میں ہونے والی پیش رفت کو سراہا۔
برریفنگ کے دوران بلال اظہر کیانی نے بتایا کہ ڈیجیٹل ادائیگیاں استعمال کرنے والے فعال مرچنٹس کی تعداد 5 لاکھ سے بڑھ کر 20.3 لاکھ ہو گئی ہے، جو جون 2026 کے لیے مقرر کردہ 20 لاکھ کے ہدف سے زیادہ ہے۔ اس تیز رفتار پیش رفت کی بنیادی وجہ حکومت کی جانب سے 'راست کیو آر' کے لیے دی جانے والی 3.5 ارب روپے کی سبسڈی تھی، جس نے تاجروں کی شمولیت کی حوصلہ افزائی کی اور ڈیجیٹل لین دین کے رجحان کو فروغ دیا۔ گیٹس فاؤنڈیشن نے اپنے شراکت دار ادارے 'کرنداز' کے ذریعے پاکستان کی ڈیجیٹل مالیاتی توسیع کے لیے اپنی مسلسل حمایت کا اعادہ کیا۔
بنیادی ڈیجیٹل ادائیگی کے انفراسٹرکچر کے علاوہ، گفتگو میں طویل مدتی مالیاتی استحکام کو یقینی بنانے کے لیے قومی معیشت کو دستاویز کرنے اور باقاعدہ بنانے کے لیے وسیع تر معاشی اصلاحات پر زور دیا گیا۔ وزیر مملکت نے چھوٹے تاجروں کے لیے حال ہی میں متعارف کرائی گئی "آسان ٹیکس اسکیم" کی تفصیلات بتائیں، جو سخت کارروائی کے بجائے رضاکارانہ اور مراعات پر مبنی رجسٹریشن پر انحصار کرتی ہے تاکہ تاجروں کو رسمی ٹیکس نیٹ میں شامل کیا جا سکے۔
حکومت نے رواں مالی سال کے لیے اپنے جامع اہداف بھی پیش کیے، جن میں تاجروں کی مزید شمولیت، سرکاری شعبے کی ادائیگیوں کو وسیع پیمانے پر ڈیجیٹل بنانا اور ڈیجیٹل بینکنگ پلیٹ فارمز پر صارفین کے تجربے کو بہتر بنانا شامل ہے۔ اجلاس میں مالیاتی شمولیت بالخصوص رسمی مالیاتی خدمات تک رسائی میں صنفی تفریق کو کم کرنے میں نمایاں پیش رفت پر روشنی ڈالی گئی۔ دونوں فریقین نے مستقبل کی ڈھانچہ جاتی اصلاحات میں معاونت کے لیے ایک حکمت عملی کی شراکت داری کے فریم ورک کے ذریعے اپنے ترقیاتی ایجنڈے کو وسعت دینے پر اتفاق کیا۔
