اسلام آباد: پاکستان، ترکیہ اور سعودی عرب سمیت آٹھ عرب و مسلم ممالک نے مقبوضہ فلسطینی علاقے میں غیر قانونی اسرائیلی بستیوں سے درآمدات پر پابندی اور ان سرگرمیوں سے منسلک خدمات کو محدود کرنے کے برطانوی فیصلے کا خیرمقدم کیا ہے۔

ایک مشترکہ اعلامیے میں پاکستان، ترکیہ، مصر، انڈونیشیا، اردن، قطر، سعودی عرب اور متحدہ عرب امارات کے وزرائے خارجہ نے برطانوی اقدامات کی تعریف کی اور عالمی برادری سے بھی ایسے ہی قدم اٹھانے کا مطالبہ کیا۔ گروپ نے عالمی طاقتوں پر زور دیا کہ وہ بین الاقوامی قانون کی پاسداری اور اس پر عمل درآمد یقینی بنائیں، نیز فلسطینی سرزمین پر بستیوں کی غیر قانونی توسیع میں ملوث تمام تنظیموں اور افراد کا محاسبہ کریں۔

مشترکہ اعلامیے میں بستیوں کی توسیع کو روکنے کے لیے ٹھوس بین الاقوامی اقدامات کی ضرورت پر زور دیا گیا، جسے وزرائے خارجہ نے تسلیم شدہ بین الاقوامی قانونی فریم ورک کی خلاف ورزی قرار دیا۔ آٹھوں ممالک نے عالمی شراکت داروں پر زور دیا کہ وہ غیر قانونی بستیوں کا وجود برقرار رکھنے والے اقدامات کی روک تھام کے لیے برطانیہ کے اس پالیسی فریم ورک کی پیروی کریں۔

وسیع تر جیو پولیٹیکل بحران پر گفتگو کرتے ہوئے وزرائے خارجہ نے اس عزم کا اعادہ کیا کہ غزہ مقبوضہ فلسطینی علاقے کا اٹوٹ انگ ہے۔ انہوں نے زور دیا کہ جغرافیائی یا آبادیاتی کیفیات میں یکطرفہ تبدیلیوں کے ذریعے استحکام حاصل نہیں کیا جا سکتا۔

اعلامیے کے اختتام پر علاقائی سفارت کاری کے مشترکہ عزم کا اظہار کرتے ہوئے کہا گیا کہ عادلانہ، پائیدار اور جامع امن کا انحصار مکمل طور پر ایک قابل عمل دو ریاستی حل پر ہے۔ وزرائے خارجہ نے واضح کیا کہ امن کے لیے 4 جون 1967ء کی سرحدوں پر مبنی ایک آزاد، خودمختار، جغرافیائی طور پر جڑی ہوئی اور فعال فلسطینی ریاست کا قیام ضروری ہے، جس کا دارالحکومت مشرقی یروشلم ہو۔