اسلام آباد: انسداد دہشت گردی کی عدالت (اے ٹی سی) نے فیڈرل انویسٹی گیشن ایجنسی (ایف آئی اے) کو وزیراعلیٰ خیبر پختونخوا سہیل آفریدی اور قائد حزب اختلاف عمر ایوب سمیت پاکستان تحریک انصاف (پی ٹی آئی) کے 24 ارکانِ اسمبلی کے پاسپورٹ بلاک کرنے کا حکم دے دیا ہے۔ جج ابو الحسنات محمد ذوالقرنین نے تھانہ کوہسار میں درج مقدمے میں پولیس کی باضابطہ درخواست پر یہ ہدایت جاری کی۔

عدالت نے قرار دیا کہ ملزمان کو ریاستی اداروں پر حملوں اور دہشت گردی کو فروغ دینے جیسے سنگین الزامات کا سامنا ہے۔ تفتیشی حکام نے مؤقف اختیار کیا کہ مذکورہ ارکانِ اسمبلی جاری قانونی کارروائی سے بچنے کے لیے بیرونِ ملک فرار ہونے کی کوشش کر سکتے ہیں۔

اے ٹی سی نے مزید کہا کہ نامزد افراد بار بار عدالت میں پیش ہونے میں ناکام رہے جبکہ عبوری ضمانت حاصل کرنے والے متعدد رہنما تفتیش میں شامل نہیں ہوئے، جس کے باعث ان کے بین الاقوامی سفر کو محدود کرنے کا عدالتی حکم جاری کیا گیا۔