میامی: امریکی شہر میامی کے انٹرنیشنل ایئرپورٹ پر لینڈنگ کے دوران ایمیزون پرائم ایئر کا کارگو طیارہ رن وے سے باہر نکل کر حادثے کا شکار ہو گیا، جس کے نتیجے میں کم از کم پانچ افراد ہلاک ہو گئے۔
حکام کے مطابق پرائم ایئر کی پرواز 7598 اتوار کو مقامی وقت کے مطابق دوپہر دو بجے سے کچھ دیر قبل ایئرپورٹ کے ایک رن وے سے باہر نکل گئی اور زمین پر موجود کئی گاڑیوں سے ٹکرا گئی۔
میامی ڈیڈ فائر چیف رے جداللہ نے بتایا کہ حادثے میں پانچ افراد زخمی ہوئے جن میں تین کی حالت تشویشناک ہے۔ کم از کم دو افراد ان گاڑیوں میں پھنس گئے جنہیں طیارے نے ٹکر ماری، جبکہ طیارے کے پائلٹ اور معاون پائلٹ بھی جہاز کے اندر پھنس گئے۔
حکام نے ہلاک ہونے والے افراد کی شناخت فوری طور پر ظاہر نہیں کی۔
ریسکیو کارروائی میں 60 سے زائد امدادی یونٹس اور تقریباً 200 اہلکاروں نے حصہ لیا۔ حادثے کے بعد امدادی کارکنوں کو طیارے سے جاری ایندھن کے اخراج سے بھی نمٹنا پڑا۔
حادثے کے فوراً بعد ایئرپورٹ پر تمام پروازیں عارضی طور پر روک دی گئیں، تاہم اتوار کی شام تک چار میں سے دو رن وے دوبارہ کھول دیے گئے۔
حادثے کا شکار طیارہ 32 سال پرانا بوئنگ 767 300 کارگو جہاز تھا، جسے ایمیزون کی جانب سے کارگو ایئرلائن 21 ایئر چلا رہی تھی۔ طیارہ پورٹو ریکو کے شہر سان خوان سے روانہ ہوا تھا۔
پروازوں کی نگرانی کرنے والی سروس فلائٹ ریڈار 24 کے مطابق طیارہ رن وے سے باہر نکلتے وقت تقریباً 112 ناٹ یعنی 129 میل فی گھنٹہ کی رفتار سے سفر کر رہا تھا۔
امریکی نیشنل ٹرانسپورٹیشن سیفٹی بورڈ نے حادثے کی تحقیقات کے لیے چیئرپرسن جینیفر ہومینڈی کی سربراہی میں ایک ٹیم روانہ کر دی ہے۔ بورڈ کی جانب سے پیر کو میامی میں ابتدائی بریفنگ متوقع ہے۔
ایمیزون کی ترجمان کیلی نینٹل نے کہا کہ کمپنی مقامی حکام کے ساتھ مل کر حادثے کی وجوہات جاننے کی کوشش کر رہی ہے اور حادثے میں شامل تمام افراد کی حفاظت اور بہبود کمپنی کی اولین ترجیح ہے۔
بوئنگ اور 21 ایئر نے بھی حکومتی تحقیقات میں تعاون کرنے کا اعلان کیا ہے۔
یہ ایمیزون پرائم ایئر سے منسلک کوئی پہلا مہلک طیارہ حادثہ نہیں۔ فروری 2019 میں اٹلس ایئر کی پرواز 3591، جو ایمیزون کی جانب سے چلائی جا رہی تھی، میامی سے ہیوسٹن جاتے ہوئے ٹیکساس کی ٹرینیٹی بے میں گر کر تباہ ہو گئی تھی۔ اس حادثے میں طیارے میں سوار تینوں افراد ہلاک ہوئے تھے۔
حالیہ حادثے کی تحقیقات میں یہ معلوم کیا جائے گا کہ طیارہ رن وے سے کیوں باہر نکلا اور آیا کسی فنی خرابی، آپریشنل مسئلے، موسم یا کسی اور عنصر نے حادثے میں کردار ادا کیا۔
