کراچی: پاکستانی اداکار منیب بٹ نے محکمہ ثقافت و سیاحت کے مینجمنٹ بورڈ کے اعلیٰ سطحی اجلاس کے بعد سندھ بھر کے 700 سے زائد فنکاروں کے لیے فلاحی وظائف کی منظوری کا اعلان کیا ہے۔ منیب بٹ نے اپنے آفیشل انسٹاگرام ہینڈل پر اجلاس کی تصاویر شیئر کیں، جس کی صدارت صوبائی وزیر برائے ثقافت و سیاحت سید ذوالفقار علی شاہ نے کی۔ اس اجلاس میں صوبے بھر کی آرٹس کونسلوں کے صدور اور مینجمنٹ بورڈ کے ارکان بھی شریک تھے۔

سوشل میڈیا پر بات کرتے ہوئے منیب بٹ نے تصدیق کی کہ کراچی سے تعلق رکھنے والے فنکاروں کی جانب سے محکمہ ثقافت کو جمع کرائی گئی تمام زیر التوا فلاحی درخواستیں اجلاس کے دوران منظور کر لی گئی ہیں۔ اداکار نے اظہارِ تشکر کرتے ہوئے اس اقدام کو تخلیق کاروں کی خدمات کے اعتراف اور سندھ کی فنکار برادری کو ضروری مالی مدد کی فراہمی کے لیے ایک اہم قدم قرار دیا۔ 2012 میں اداکاری کا آغاز کرنے والے معروف پاکستانی اداکار منیب بٹ نے بورڈ کے اس فیصلے کی تعریف کی اور وظائف حاصل کرنے والے فنکاروں کو اس تاریخی فلاحی منظوری پر مبارکباد پیش کی۔