پیرس: فرینکو سعودی اسٹریٹجک پارٹنرشپ کونسل کے پہلے اجلاس کے دوران سعودی ولی عہد شہزادہ محمد بن سلمان کی قیادت میں سعودی وفد نے پیرس میں ایلیزی پیلس میں فرانسیسی حکام سے گفتگو کے بعد دفاع، آرٹیفیشل انٹیلی جنس، سیاحت، بنیادی ڈھانچے اور ثقافتی تعاون کے شعبوں میں متعدد معاہدوں پر دستخط کیے۔
دونوں ممالک نے قدیم شہر العلا کی ترقی کے لیے اپنے تعاون کی مدت 2035ء تک بڑھانے پر اتفاق کیا۔ یہ معاہدہ آثار قدیمہ، ثقافت، سیاحت، جدت طرازی، پائیدار ترقی اور العلا کے قدرتی ماحول کے تحفظ سے متعلق منصوبوں کی معاونت کرے گا۔ یہ شراکت داری 2034ء کے فیفا ورلڈ کپ کی تیاریوں کا حصہ ہے، جس کے ذریعے سعودی عرب کو امید ہے کہ اس کی سیاحت کو فروغ ملے گا۔ مالیاتی ترتیبات میں سعودی انرجی کے لیے 3 ارب امریکی ڈالر اور ریاض میٹرو اور سعودی ایکسپو 2030ء سے منسلک منصوبوں سمیت مختلف ڈیولپمنٹس کے لیے تقریباً 5 ارب امریکی ڈالر شامل ہیں۔
ایک اور معاہدے کے تحت پیرس کے علاقے سرجی پونٹوائز میں 6 ارب یورو کا سرمایہ کاری منصوبہ شامل ہے۔ توقع ہے کہ اس منصوبے سے تین تھیم و تفریحی پارکس، رہائش، کھانے پینے کی سہولیات اور ہاؤسنگ کے ذریعے تقریباً 22 ہزار ملازمتیں پیدا ہوں گی۔
فرینکو سعودی بزنس فورم کے دوران، سی ایم اے سی جی ایم اور ریڈ سی گیٹ وے ٹرمینل نے جدہ اسلامک پورٹ پر ٹرمینل فور کی ترقی کے لیے 43 کروڑ 40 لاکھ یورو کے معاہدے پر دستخط کیے۔
فرانسیسی کمپنی السٹوم نے ریاض میٹرو کی لائن 3 اور 6 کے لیے مزید ٹرین سیٹس کی فراہمی کا 50 کروڑ یورو کا ٹھیکہ حاصل کیا اور لائن 7 کے لیے ٹرین اسمبلنگ پلانٹ میں سرمایہ کاری کی حمایت پر اتفاق کیا۔
فرانسیسی نیوکلیئر فیول کمپنی اورانو اور سعودی مائننگ کمپنی معادن نے ٹیکنالوجی کی ترقی پر یادداشت پر دستخط کیے، جبکہ مسٹرل اے آئی اور ہیومین نے اے آئی ماڈلز اور کمپیوٹنگ صلاحیتوں پر تعاون پر اتفاق کیا۔
سعودی عرب اور فرانس نے آرٹیفیشل انٹیلی جنس، کوانٹم ٹیکنالوجی اور دیگر جدید ٹیکنالوجیز میں تعاون کی یادداشت پر دستخط کیے، جس کا مقصد تربیت اور فوجی تعلیم میں دفاعی تعاون کو مضبوط بنانا ہے۔
